Liwat nga ginpamatud-an sang Pilipinas nga masarangan sini ang China sa patag sang hinampang!
Ini paagi sa 24-anyos nga Filipina professional billiards player halin sa Zamboanga City nga si Chezca Centeno nga nakabulsa sang pinakadaku nga titulo sa iya bug-os nga karera sang nagpangibabaw ini sa 2023 World 10-Ball Women’s Championship sa Klagenfurt, Austria.
Ginlutos ni Centeno ang three-time world 9-ball queen nga si Yu Han sang China sa finals, 9-5, rason nga nakuha sini ang $50,000 ukon masobra P2.8-milion nga top prize nga amo ang pinakadaku nga premyo sa history sang amo nga women’s event.
Photo: Rubilen Amit/FB
Ang pagtindog bilang world 10-ball champion ang nagdugang sa apat ka gold medals nga nadag-an sang Filipina player sa Southeast Asian Games lakip na sa 10-ball competition sa Manila sang 2019.
Sa semifinals, naghimo man sang upset si Centeno sang ginlutos sini ang British legend nga si Allison Fisher, 9-8. Ang amo nga kadalag-an amo na ang ikaduha nga bes nga nalutos ni Centeno ang English veteran bangud nagpangibabaw man ini, 7-3, sa elimination stage.
Nalutos man sang Zamboanguena si Melanie Sussenguth sang Germany, 9-0, kag Chou Chieh-Yu sang Chinese Taipei, 9-2, sa knockout phase.
Sa qualification stage, ginpanglutos man sini si Xiaoting Pan sang China, 7-4, kag si Fisher.
Ini na ang ikatatlo nga tion nga nagpangibabaw ang Pilipinas World 10-Ball Women’s Championship kasunod sa two-time world 10-ball champion nga si Rubilen Amit nga nakakuha sang amo kadalag-an sang 2009 kag 2013.
Si Amit amo man ang mentor ni Centeno sa sini nga tournament.
Ang WPA World Ten-ball Championship isa ka professional ten-ball pool tournament nga sanctioned sang World Pool-Billiard Association. Una ini nga ginpatigayon sang 2008 sa Pilipinas kag ginsundan sang mga tournament diri gihapon sa pungsod sang 2009 kag 2011. #
