Nagapabilin sa Wind Signal No. 1 ang Iloilo, Capiz, Aklan, Antique, kag Guimaras ukon ang bilog nga Western Visayas bangud sa Bagyo Verbena.
Sandig sa alas singko sa kaagahon nga weather bulletin sang state weather bureau, napabilin sang bagyo ang kabaskugon sini samtang nagahulag ini pa-naaminhan-nakatundan padulong sa Negros Island Region.
Base sa data sa Iloilo Doppler Weather Radar, ulihi nakit-an ang sentro sang bagyo sa kadagatan nga sakop sang Pinamungahan, Cebu.
Dala sini ang kabaskugon sang hangin nga tubtub sa 55 km/h kag pagmadlos nga tubtub sa 90 km/h. Nagahulag si Verbena sa direksyon nga pa-naaminhan-nakatundan sa kadasigon nga 25 km/h.
Magluwas sa Western Visayas, ang iban pa nga areas sa Visayas nga napaidalom sa Wind Signal No. 1 amo ang Negros Occidental, Negros Oriental, Siquijor, Cebu, Bohol, Samar, Eastern Samar, Biliran, Leyte, kag Southern Leyte.
May areas man sa Luzon kag Mindanao nga nabatak sa amo nga wind signal kun sa diin posible ang minimal to minor impacts bangud sa mabaskog nga hangin.
Magluwas diri, ang Northeast Monsoon ukon Amihan kag ang bagyo ang pareho nga magapamadlos sang hangin sa mga lugar nga may signal number lakip na sa Western Visayas.
11:10 PM kagab-i, nag-landfall ini sa Jagna, Bohol kag 2:40 kaina sang kaagahon, nag-landfall ini sa Talisay, Cebu.
Sa track forecast, magapadayon ini sa paghulag pa-nakatundan naaminhan-nakatundan sa Visayas antes magtuhaw sa West Philippine Sea buwas sa aga. Sunod ini nga magaliso pa-nakatundan kag magalabay sa naaminhan sang Kalayaan Islands kag magaguwa sa Philippine Area of Responsibility sa Huwebes sang aga.
Samtang yari ini sa Visayas, magapabilin ini nga tropical depression. Magalab-ot ini sa tropical storm category antes makaabot sa northern Palawan ukon possible man nga kun yara na ini sa West Philippine Sea.
Posible man suno sa weather bureau nga makadangat ini sa severe tropical storm category samtang yara sa tunga-tunga sang West Philippine Sea sa ibabaw nga parte sang Kalayaan Islands.
