Mas nagabaskog pa ang kusog ni Bagyo Uwan samtang nga nagapalapit ini sa Catanduanes.
Sa alas singko sa kaagahon nga weather bulletin sang state weather bureau subong nga Domingo, Nobyembre 9, nakabutang nga nakit-an ang mata sang bagyo sa kalayuon nga 195 kilometros nasidlangan sang Virac, Catanduanes.
Dala sini ang kabaskugon sang hangin nga tubtub sa 175 km/h malapit sa sentro kag pagmadlos nga tubtub sa 215 km/h. Namentenar man sini ang direksyon nga pa-nakatundan naaminhan-nakatundan sa kadasigon nga 35 km/h.
May mga area na sa Luzon kag Visayas nga napaidalom sa wind signal numbers 2, 3, kag 4.
Napaidalom naman sa Wind Signal No. 1 ang Guimaras, Iloilo, Capiz, Aklan, kag ang Antique ukon ang bilog nga Rehiyon VI.
Sa Wind Signal number 1, lauman nga may mabaskog nga hangin, may warning lead time nga 36 oras, kag may dala nga minimal to minor nga peligro sa kabuhi kag sa mga propiedad.
Suno sa weather bureau, Signal No. 5 ang pinakamataas nga wind signal nga mahimo mapaguwa samtang yari sa Philippine Area of Responsibility (PAR) si Bagyo Uwan.
Ma-eksperyensyahan man ang mamunog nga pag-ulan, mabaskog nga hangin, kag storm surge mangin sa mga lugar nga malayo sa lugar kun sa diin maga-landfall ang bagyo.
Gina-forecast nga magahulag ang bagyo pa-nakatundan naaminhan-nakatundan sa masunod nga 24 oras ukon i-mentenar sini ang pareho nga direksyon sini subong.
Sa track forecast, ang mata sang bagyo magalabay malapit sa Catanduanes subong nga aga kag maga-landfall sa Aurora karon sa gab-i ukon buwas sa kaagahon. Bangud sa kalapiton sini, posible nga direkta ini nga mag-igu ukon mag-landfall sa Catanduanes.
Pagkatapos sang landfall, maga-agi ang bagyo sa kabukiran sang Northern Luzon kag magatuhaw sa Lingayen Gulf ukon sa kadagatan sang Pangasinan ukon La Union sa Lunes sang aga.
Suno pa sa weather bureau, magalab-ot si Uwan sa super typhoon category kag mahimo mag-landfall kun malapit na ukon yara na mismo sa iya nga peak lifetime intensity.
Ang paglabay sini sa kabukiran ang mahimo makapahina sa pwersa sini apang ginalantaw nga magapabilin ini bilang typoon samtang yara pa sa teritoryo sang Northern Luzon.#
