Gin-athag sang pioneer kag active member sang kilala nga Binhi Band nga madugay na nga nagseparar sa grupo ang duha ka mga lalaki nga nadakpan sa buy bust operation sa Calumpang, Molo, Iloilo City.
Ang mga nadakpan amo sanday Clarence Demaisip, 57-anyos, residente sang Calumpang kag si Rodney Bernadas,62-anyos, residente sang Jaro, Iloilo City.
Sila ang nakuhaan sang ginabanta 62 grams nga kabug-aton sang ginapasuni shabu nga may standard drug price nga P421,600.
Sa interview sang Bombo Radyo kay Taydiu Magahum, pioneer member sang Binhi Band, iya ginkumpirma nga bokalista gid man nila sang una si Demaisip kag gitarista naman si Bernadas.
Apang suno kay Magahum, 2002 pa sang nagbiya sa grupo ang duha kag wala na liwat nakabalik sa ila banda.
Nagpasalamat naman si Magahum sa ila mga supporters nga nagbulig agud matinluan ang ila pangalan.
Matandaan nga sa inisyal nga impormasyon, ginpahayag sang hepe sang Molo Police Station nga si Police Captain Ryan Christ Inot nga active member sang banda ang mga arestado apang sang ulihi, natumod nga former members ang mga ini.
