Napili nga “Women of the Year” sang Billboard Philippines ang P-pop powerhouse nga BINI nga ginabug-usan nanday Jhoanna, Aiah, Colet, Maloi, Gwen, Stacey, Mikha.
Ginpasidunggan sila sa “Women in Music: The Executive Edition” ceremony kaupod sa iban nga dalagku nga female industry leaders.
Kaupod sang girl group sa seremonya amo sanday Rhiza Pascua (Management, Concerts, and Live Entertainment), Kathleen Dy-Go (OPM Vanguard), Marivic Benedicto (Music Rights), Georgette Tengco (Music Distribution), Audry Dionisio (Independent Record Labels) kag Roslyn Pineda (Industry and Record Label).
Ikaduha na ini nga tion nga ginkilala sang Billboard Philippines ang BINI matapos nakuha man anay ang Rising Star award sang March 2024.
Sang nagligad nga edisyon, lakip sa awardees amo sanday Sarah Geronimo, Regine Velasquez, Pilita Corrales, Ena Mori, Morissette Amon kag Belle Mariano.
Nahibaluan nga lakip sa ginahandaan subong sang girl group amo ang upcoming world tour nga may shows sa Dubai, London, Canada kag sa US matapos ang first leg sa Philippine Arena sa temprano nga bahin subong nga tuig.#
