Napilitan ang P-pop girl group nga BINI nga utdon kag indi pagpalawigon ang ila nga performance sa Bangus Festival sa Dagupan City bangud sa pila ka fans nga nalipong kag naglain ang pamatyag bangud sa tuman nga init.
Isa ang BINI sa performers sa brand concert sa amo nga selebrasyon apang natabuan man nga ang Dagupan amo ang isa sa pinakamainit nga lugar sa pungsod kun sa diin nagatupa masami sa “danger level” ang heat index.
Pila ka beses ginhingyo sa fans nga mag-isol kag indi na magsaka sa elevated spots kag indi magtikludanay.
Tato ka kanta lamang ang natapos sang BINI nga amo ang “Lagi,” “Huwag Muna Tayong Umuwi,” kag ang “Pantropiko.”
Ginkumpirma man sang Dagupan City Disaster Risk Reduction and Management nga may attendees matuod nga nalipong apang wala man sang seryoso nga halit.
Nagpangayo naman ang pasaylo ang girl group nga wala naglawig nga ila performance bangud nga indi na nila gusto nga makatuga pa sang halit. Nagpasalig man ang BINI nga magabalik sila sa Dagupan kag ginhingyo sa fans nga iprayoridad gid anay ang safety sa tanan nga tion.
“Not everything will always be perfect and smooth sailing… I pray for your recovery and the wellness of everybody,” kabahin sang post ni Aiah. “I hope for the upcoming shows and events, we all prioritize safety, wag mag tulakan, and since painit ng painit din ngayon dito sa Pinas, always bring water and stay hydrated!”
