Gin-anunsyo sang Bureau of Internal Revenue (BIR) ang bag-o nga requirement nga tax stamps nga ibutang sa tanan nga vape products nga ginabaligya sa pungsod.
Epektibo sa Hunyo 1, 2024, ang Revenue Memorandum Circular 59-2024 ang naga-mandate sa paggamit sang 4th Generation Internal Revenue Stamps sa sini nga vapor products.
Tuyo sini suno kay BIR Commissioner Romeo D. Lumagui Jr. nga ma-address ang proliferation sang unregulated vape products sa mga mercado.
Base sa direktiba, ang locally manufactured vapes ang indi pwede mahalin sa production sites kun wala sang natapik nga latest tax stamps.
Gindugang man sang bureau nga ang importasyon kag pag-release sang vapor products halin sa Bureau of Customs custody ang istrikto nga dumilian magluwas kun ang prescribed revenue stamps ang nakatapik na sa produkto.
Suno pa sa bureau, ang presyo sang tax stamps ang naka-set sa P1 per piece sa mga orders nga may total nga minimum sang 1.65 million pieces kag P2.50 per piece sa orders nga at least 165,000 pieces.
Magluwas sa tax stamp costs, dapat man nga bayaran sang vape manufacturers kag importers ang excise taxes base sa type kag quantity sang vape product agud mapilian kun sa diin ang nicotine-based kag ang conventional freebase variants.
Suno pa sa BIR, mahimo na makasugod ang vape manufacturers kag importers sa pag-order para sa tax stamps umpisa sa May 8, 2024.
Ini nga bag-o nga regulation ang kabahin sang paninguha sang gobyerno nga mapatuman ang proper taxation kag regulation sang vape products sa Pilipinas kag tapnaon ang paglapta sang illicit vapes sa merkado.#
