Nagpasa sang courtesy resignation sanday Bureau of Internal Revenue (BIR) Commissioner Romeo Lumagui Jr. kag Bureau of Customs (BOC) Commissioner Bienvenido Rubio, bisan pa nga ang panawagan sang resignation para sa performance review ni Pres. Ferdinand Marcos Jr. ginatutok lang sa mga Cabinet members kag mga opisyal nga may secretary-level ranggo.
Ginpahayag ni Comm. Lumagui ang bug-os nga suporta sa inisyatibo sang Presidente para sa transparency sa serbisyo publiko.
Ginpahayag niya nga handa siya magbiya sa iya pwesto agud hatagan sang ligwa ang Presidente sa pag-assess sang iya performance kag sa pagpangita sang mas epektibo nga paagi para mapaayo ang serbisyo sang BIR sa publiko.
Samtang pareho man ang ginpahayag ni Comm. Rubio nga rason sa iya pagsumiter sang courtesy resignation.
Suno sa iya, importante nga may ligwa ang Presidente sa pag-review sang performance sang mga ahensya para mas mapalapad kag mapabaskug pa ang serbisyo para sa mga Pilipino.
Ginpabutyag man ni Rubio nga isa ini ka dako nga dungog sa iya nga pagserbe bilang pinuno sang Customs.
Nagpasalig man siya nga padayon ang iya suporta sa mga polisiya kag reporma ni President Marcos Jr. para sa kaayuhan kag pag-uswag sang pungsod.
Ginalauman nga ang mga tikang nga ini magahatag sang dugang nga kredibilidad kag pagsalig sang publiko sa mga ahensya sang gobyerno.
