Nagpagwa ang Bureau of Internal Revenue ukon BIR sang bag-o nga patakaran agud mashare ang gasto sa paghatag sang 20 porsyento nga discount sa mga senior citizen sa pagbakal sang bulong kag iban pa nga kinahanglanon.
Sa idalom sang Revenue Regulations No. 007-2026, indi na lamang ang mga botika ang magapas-an sang gasto sang nasambit nga discount, kundi mangin kabahin na sini ang mga kompanya nga nagahimo sang bulong, mga distributor kag wholesaler.
Suno sa BIR, ang bahin sang gasto nga pas-anon sang kada kompanya ukon retailer magadepende sa ila kasugtanan.
Ang kada isa mahimo lamang mag-angkon sang tax deduction suno sa aktuwal nga bahin sang gasto nga ila ginbayaran.
Pahayag pa nga kinahanglan nga may nasulat kag dokumentado nga kasugtanan ang mga partido parte sa pagbahin sang gasto, kag kinahanglan man nga maghatag sila sang kopya sini sa Department of Health ukon DOH.
Dugang pa sang ahensya, paagi sa sini nga bag-o nga patakaran, ginatinguhaan sang BIR nga mas patas nga mabuhinan ang pinansyal nga responsibilidad sa paghatag sang senior citizen discount sa bug-os nga supply chain sang mga bulong.
