Gin-athag ni Iloilo 4th District Representative Ferjenel Biron nga indi insertion sa 2025 General Appropriations Act ang P1.38 billion nga alokasyon para sa ila Distrito.
Sa iya ginpagwa nga statement, ginsiling ni Biron nga ang amo nga kantidad ang kabahin sang regular allocation nga ginpain sa mga distrito sa bilog nga pungsod paagi sa establisado nga proseso sang pagplano, agency proposals, kag sistema sang national budgeting.
Suno sa kongresista, dako nga porsyon sang sini nga alokasyon ang nagasuporta sa local infrastructure projects, kalakip ang mga dalan, taytay, flood mitigation structures, school buildings, kag iban nga pasilidad nga nagatuyo nga mapasanyog pa ang public service kag maduso ang community development.
Suno pa sa iya, ang tanan nga proyekto sa listahan ang nagpaidalom sa standard evaluation kag koordinasyon sa Department of Public Works and Highways (DPWH).
Dugang pa sini nga base sa DPWH findings, wala sang substandard kag wala man sang ghost projects sa 4th District of Iloilo.
Suno pa diri, humalin sang siya ang nangin Congressman, wala gid sang ghost projects sa iya distrito, kag tanan nga proyekto sa idalom sang GAA ang ginpatuman sang kompleto kag wala sang insertion.
