Ginapabugal ni presumptive Iloilo Fourth District Representative Dr. Ferjenel Biron nga may mga banwa sa probinsya sang Iloilo nga nagpanindugan para sa Uniteam presidential kag vice presidential candidates apisar nga kay Vice President Leni Robredo nagkadto ang boto sang kadam-an sa Iloilo.
Sa 42 ka mga banwa kag component city sa probinsya, daog si presumptive President Bongbong Marcos sa Barotac Nuevo, Guimbal, Anilao, Sara, Estancia, kag Passi City.
Suno kay Biron nga amo ang campaign manager sang Uniteam sa Iloilo, daog man si leading vice presidential candidate Sara Duterte-Carpio sa bilog nga kuarto distrito.
Sa kuarto distrito man may pinakagamay nga abanse si Robredo kay Marcos.
Sa kabilugan nga probinsya sang Iloilo, pierde si Marcos kay Robredo.
Nakakuha si Marcos sang 374,144 votes samtang si Robredo ang nakakuha sang 579,525 votes.
