ILOILO CITY – Gintawag nga pulok-pulok ni Bacolod Vice Mayor kag subong Acting Mayor El Cid Familiaran si Iloilo City Mayor Jerry Treñas.
Ini ang kasunod sang pagdeklarar ni Treñas sa bise alkalde nga persona non grata sa syudad sang Iloilo bangud sa ginapahayag pagtapok sa syudad sang 80 ka mga badjao nagikan sa Bacolod City.
Sa Facebook post sang bise alkalde, iya ginpahayag nga kuntani, nag-imbestigar anay ang alkalde antes nagpagwa sang desisyon.
Dugang pa niya, daw kaangay nga naanad na lamang si Treñas sa pagpang-bully.
Una na nga ginpahayag ni Treñas nga indi “dumping ground” sang badjao ang syudad kag dapat nga may yara sang nagaka-igo nga koordinasyon sa tunga sang duha ka mga local government units.
Gintawag man niya nga “stupid” ang nangin akto ni Familiaran.
Nahibaluan nga ang 80 ka mga badjao nga nagpadulong sa Iloilo City ang ginalakipan sang 13 ka mga pamilya kun sa diin, 20 diri ang mga menor de edad.
Base sa nahibaluan nga impormasyon sang alkalde, local government unit-assisted ang pagtapok sang badjao sa syudad.
Ang mga badjao ang ginpasakay sa roll-on/roll-off sa Bacolod Real Estate Development Corporation (BREDCO) port padulong sa Dumangas port.
