ILOILO CITY – Ginlunsyar sang Iloilo Police Provincial Office ang “Bisikleta Iglesia Patrol” kadungan sang Huwebes Santo.
Ang ini nga paagi sang patrolya sang Philippine National Police ang makabulig agud nga malab-ot ang mga lugar nga mabudlay sudlan sang mga patrol cars.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga ang tanan nga mga units ang may yara sang isa ka designated Bisikleta Iglesia Patrol.
Katuyuan sang sini nga programa nga madugangan pa ang police visibility sa mga simbahan, resort, transportation hubs, sea ports kag sa mga places of convergence.
Dugang pa niya, magalawig ini tubtob sa katapusan nga adlaw sang semana santa.
Pahayag pa ni Araño, may mga police stations nga may gin-issue nga bisikleta samtang ang iban nga personnel ang nagagamit sang ila personal nga bisekleta.
