ILOILO – Gin-athag sang Bureau of Jail Management and Penology (BJMP) Region 6 nga wala sang kahilabtanan ang jamming device sang ila pamunuan nga nahamtang sa Iloilo District Jail (IDJ) sa problema sang signal sa mga pumuluyo sa Brgy. Nanga, Pototan, Iloilo.
Sa interview sang Bombo Radyo kay JSupt. Gilbert Peremne, Deputy Director for Administration sang BJMP, iya ginpahayag nga personal siya nga nagkadto sa amo nga lugar kaupod ang regional director sa pagpatigayon sang ila imbestigasyon apang santu sa mga sabat sa ila sang mga residente sa lugar, wala sang kaangtanan ang device sa reklamo sang signal jam
Suno kay Peremne, posible nga mahina ang signal sang mga telecommunication companies sa lugar.
Iya ginpahayag nga may ara sang standard operating procedure (SOP) nga ginasunod ang ila pamunuan, lakip na ang pagsulat sa National Telecommunication Commission (NTC) kag sila ang nangin authorized sa procurement sang jamming device indi lamang sa IDJ kundi sa 35 pa ka mga jail facilities sa bug-os nga rehiyon.
Dugang ni Peremne, may legal sila nga basehan, clearance, kag hugot nila nga ginasunod ang specs nga ginhatag sang NTC sa diin 15-20 meters lang ang malab-utan sang device.
Iya ginapahayag nga kinahanglan nila i-oberve ang maximum security, kag ang pagbutang sang jamming device ang ginakabig nga “last resort” agud malikawan ang mga kontrabando sa sulod sang prisuhan.
Suno kay Peremne, bangud sang hearing sang Committee on Public Order and Safety sa Provincial Board nga ginhiwat kahapon kaupod ang punong barangay sang Brgy. Nanga, Pototan, mas maayo kon maghimbon ang pwersa sa pagpamuno sang Sangguniang Panlalawigan sa pagpa-uswag sang signal sa lugar.
