Nagpatigayon na sang imbestigasyon ang Bureau of Jail Management and Penology (BJMP) Region 6 kasunod sang alegasyon sang isa ka drug suspect sa Iloilo City nga may koneksyon ang iya iligal nga aktibidad sa isa ka inmate sa sulod sang Iloilo District Jail Male Dormitory sa Ungka, Jaro.
Sa interview sang Bombo Radyo kay Atty. Juniven Umadhay, spokesperson sang BJMP Western Visayas, ginpahayag sini nga santo sa mandu sang regional director, lantawon nila ang kamatuoran sa sini nga alegasyon, kag id-idon man ang tanan nga anggulo lakip na kun paano naka-komunikar ang preso pananglitan matuod ang claim sang naaresto nga suspek.
Matandaan nga sang nadakpan ang isa ka lalaki sa buy bust sa Calumpang, Molo sang Martes sang hapon, Agusto 5, nagpanugid ini nga ang preso nga si alias “Oliver” mismo ang naga-transaksyon sa iya kun sa diin kuhaon ang iligal nga droga kag pinaagi sa cellphone ang ila komunikasyon.
Suno naman kay Atty. Umadhay, wala sang personal nga cellphone ang mga naka-detain sa jail facility.
Ang ginagamit nga communication devices sa sulod amo lamang ang laptop kag regulated cellphones nga ginatugutan sang jail management para sa “e-dalaw” ukon electronic dalaw nga amo ang pang-kontak sang mga preso sa ila mga pamilya. May yara suno sa opisyal sang istrikto nga protocol kag limitasyon sa paggamit sini.
Dugang pa ni Atty. Umadhay, isa sa mga gina-imbestigahan ang posibilidad nga may personnel nga nagapalusot sang paggamit sang cellphone sa mga preso nga isa ka paglapas sa regulasyon.
Kun mapamatud-an nga may koneksiyon ang mismo nga personnel sang BJMP, mangatubang ini sang kaso kag posible nga masipa halin sa serbisyo.
Nahibaluan nga nagapatigayon man ang regional office sang random inspection tatlo tubtob apat ka beses sa isa ka semana sa tanan nga jail facilities kag sa ila mismo nga mga personnel.#
