Nagapadayon ang maid-id nga imbestigasyon sang Bureau of Jail Management and Penology (BJMP) Region 6 sa ginaalegar involvement sang katapo sang BJMP-Dumangas sa pagkumpiskar P2,380,000 nga iligal nga druga sa Barangay Balantang Jaro, Iloilo City.
Ang mga naaresto sa amo nga operasyon amo sanday Hazel Losare, 36-anyos, single kag residente sang 7th St., Lawaan Village, Brgy. Balantang, Jaro, Iloilo City kag Jose Ariel Brito, 41-anyos, kasado, minibus driver, kag residente sang Brgy. Palaypay, Anilao, Iloilo.
Sa interview sang Bombo Radyo kay Atty. Juniven Rey Umadhay, Spokesperson sang BJMP Region 6, iya ginpahayag nga nagpatigayon na ang talatapan sang greyhound operation agud matul-id kag malaragway ang mga posibilidad sa pag-angot sang ila katapo sa iligal nga buluhaton.
Ini kasunod man sang pagbuyagyag sang duha ka mga durugista nga nagakuha sila sang supply sang iligal nga druga sa amo nga talatapan.
Suno kay Umadhay, kasunod sang operasyon, may mga nakuha nga improvised nga kutsilyo kag wala na man sang iban pa nga iligal nga kontrabando nga natukiban.
Ginpaidalom man sa random drug testing ang tanan nga mga personnel sang nasambit nga talatapan kag kon matukiban nga positibo ang persona sa iligal druga, mahimo nga dagdagan ini sang nagakaigo nga penalidad.
