ILOILO CITY – Istrikto ang ginapatuman nga inspection sa mga nagasulod kag guwa sa jail facility sang Bureau of Jail Management and Penology (BJMP).
Ini agud nga matapna ang pagduging sang illegal drugs kag kontrabando sa sulod sang presuhan.
Sa interview sang Bombo Radyo kay Jail Supt. Mary Chanette Espartero, district jail warden sang BJMP- Iloilo City Male Dormitory, iya ginpahayag nga istrikto ang pagpatuman sang inspection sa mga dala sang mga nagabisita.
Suno kay Espartero, magluwas sa manual inspection, may yara man sang metal detectors kag signal jammers agud nga madasig nga matumod ang mga kontrabando kag agud nga wala sang signal ang cellphone sa sulod sang jail facility.
Isa man sa ginapatuman subong suno kay Espartero amo ang City Ordinance 2018-058 nga nagadumili sa tanan nga bisita nga magdala ukon maggamit sang cellphone kag iban pa nga mga gadgets sa sulod sang BJMP facility.
Ang madakpan nga magalapas sa nasambit nga pagsulundan ang mapreso sang 180 ka adlaw kag magabayad sang multa nga P5,000.
