ILOILO CITY-Madamo na sang nakalinya nga aktibidad ang Bureau of Jail Management and Penology kadungan sang ila ika 29 ka tuig nga anibersaryo sini nga bulan nga may tema ‘mahusay na pamamahala ng piitan, matatag na kabalikat sa pampublikong kaligtasan.
Sa interview sang Bombo Radyo kay Jail Senior Superintendent Gilbert Peremne, assistant director for administration sang Bureau of Jail Management and Penology Region 6, iya ginpahayag nga ang mga programa para sa ila anibersaryo subong nga tuig ang pinaagi nalang sa virtual, bangud sang pandemic.
Suno kay Peremne, ang mga aktibidad ang ginalakipan sang virtual regional conference sa mga wardens, virtual recognition sang tagsa ka mga units, kag online photo and slogan contest.
Ginpahayag ni Peremne nga , sila sa BJMP ang nagapasalig nga ginahimo nila ang tanan nga masarangan agud masigurado kag magapabilin nga COVID-19 free ang mga pasilidad sa bug-os nga rehiyon.
Nagapasalamat man siya suno sa natungdan sa mga stakeholders kag sa mga Local Government Unit sa padayun nga suporta nga ginahatag sa ila.
Nahibaluan nga nagdaog sa tiktok dance contest sang Department of Health kag sang World Health Organization ang BJMP, Region VI.
