Ginpasalig sang Bureau of Jail Management and Penology (BJMP) nga wala sang special treatment nga ihatag kay anay Senador Bong Revilla samtang yara ini sa presuhan.
Kahapon sang hapon sang gindala si Revilla sa Quezon City Jail Male Dormitory sa Payatas, Quezon City.
Ginpreso man sa amo nga pasilidad sanday Bryce Ericson Diaz Hernandez, Jaypee De Leon Mendoza, Arjay Salvador Domasig, kag Juanito Coronel Mendoza.
Nagaatubang sila sa kaso nga Malversation of Public Funds through Falsification of Public Documents kun sa diin indi sila mahimo makapyansa.
Suno kay Jail Superintendent Jayrex Bustinera, spokesperson sang BJMP, ibutang si Revilla sa pasilidad kun sa diin makaigo ang 10 ka tawo.
May yara sang kasilyas kag palaliguan sa amo nga jail facility, apang taga-dughan lamang ang kataason sang dividers.
Antes paupdon sa iban nga persons deprived of liberty, ipaidalom anay si Revilla sa medical quarantine nga magalawig sang isa ka semana.
Kaangay sa iban nga PDLs, magabaton man ang anay senador sang allowance nga P100 nga maga-cover na sang iya nga pagkaon sa bilog nga adlaw.
Suno pa sa BJMP, polisa nila nga wala sang VIP treatment, kag pananglitan mapamatud-an nga may special treatment, kasuhan kag manabat ang mga involved.
Nahibaluan nga temporaryo lang nga ibutang si Revilla sa amo nga male dormitory samtang nga ginahulat ang desisyon sang Sandiganbayan sa iya apelar nga isaylo sa Philippine National Police custodial facility sa Camp Crame.
