ILOILO CITY – Nakapiyansa na ang personnel sang Bureau of Jail Management and Penology nga nagmaoy kag nagtuyo nga magpalupok sang iya armas-luthang sa sulod sang isa ka bar sa Smallville Complex sa Mandurriao, Iloilo City.
Sa interview sang Bombo Radyo kay Police Major Marlon Valencia, hepe sang Mandurriao Police Station, iya ginpahayag nga gilayon nga nakabayad sang piyansa si Jail Officer 2 Iris Lizada, 38, sang Brgy. Buririao, Lambunao, Iloilo.
Suno kay Valencia, gilayon nga nagresponde ang mga pulis matapos nga nakabaton sang tawag gikan sa manager sang Saxxy’s Bar and Grill kun sa diin natabo ang pagmaoy sang BJMP personnel.
Ginpahayag ni Valencia nga kaupod ni Lizada nga nag-inom sa nasambit na bar ang iya mga abyan nga sanday Agustin Pedrosa, 40, Joel Librando, 21, kag Julius Lizada, 43, nga lunsay sang Brgy. Burirao, Lambunao, Iloilo.
Santo sa pagpangusisa, ginpakita-kita kag ginkasa ni Lizada ang iya service firearm sang ginsukot sang manager kag bouncer sang Saxxy’s Bar and Grill sang ila balayran nga P2,025.
Samtang, ginkumpirma sa Bombo Radyo ni Senior Jail Officer 3 Leo Lacerna, pinuno sang Investigation and Prosecution Division sang Bureau of Jail Management and Penology 6, nga gin relieve na sa pwesto si Lizada.
Suno kay Lacerna, temporaryo nga iga-assign sa BJMP Region 6 ang nasambit nga personnel.
Ginpahayag ni Lacerna nga magluwas sa paglapas sa pagsulundan nga nagadumili sa mga uniformed personnel nga mag-inom sa pampubliko nga lugar, ginlapas man ni Lizada ang pagsulundan tuhoy sa limitasyon sa pagdala sang service firearm.
Magluwas sa kaso kriminal, ginpahayag ni Lacerna nga mahimo man nga makasuhan si Lizada sang kaso administratibo kasubong sang grave misconduct kag conduct unbecoming of a jail officer.
Pagkapreso kag dismissal sa trabaho ang mahimo nga isilot kay Lizada.
