BAROTAC VIEJO,ILOILO-Napasaka na ang kaso nga murder kag frustrated murder batok sa katapo sang Bureau of Jail Management and Penology nga nagluthang- patay sa isa ka lalaki kag gintuyo pa gid nga patyon ang isa pa ka soltero sa Poblacion Barotac Viejo, Iloilo.
Ang suspek amo si Ryan Tupas samtang ang napatay nga biktima amo si Ernesto Escaro Jr.
Sa interview sang Bombo Radyo kay Jay Unabia,nobyo sang anak sang biktima, iya ginpahayag nga nagasinggitan kag nagapangtaya sang pusil si Tupas.
Hinali lang suno kay Unabia nga ginpalapitan sila ni Tupas kag ginluthang si Escaro.
Suno kay Unabia, maswerte naman nga wala naglupok ang pusil sang gintuyo man siya nga tiruhon sang suspek.
Indi naman makapati ang asawa sang biktima sa ginhimo ni Tupas.
Suno kay Josephine Pescador, indi man kilalahay ang suspek kag ang iya bana gani wala gid ini naglaum nga ginpatay ini sang suspek.
Matandaan nga nadakpan ang suspek pinaagi sa hot pursuit operation.
Madamo naman sang mga reklamo nagikan sa mga pumuluyo nga masami nagapangtaya si Tupas sang armas kag may napatay naman ini sang 2015.
