Natalana nga magapagwa sang Memorandum Guidance ang pamunuan sang Bureau of Jail Management and Penology (BJMP) Region VI sa ila mga personnel.
Ini ang kasunod sang nagluntad nga road rage sa Bangga Dama, Brgy. Bolong Oeste, Sta. Barbara, Iloilo.
Diri kag ginluthang-patay ang 51 anyos nga si Jail Senior Inspector Andrew Larupay, district jail warden sang BJMP sa La Carlota City sa Negros Occidental.
Sa exclusive interview sang Bombo Radyo kay Jail Senior Superintendent Gilbert Peremne, assistant regional director for administration sang BJMP Region VI, iya ginpahayag nga katuyuan sang memorandum amo nga manduan ang ila mga personnel nga kay-uhon ang character ukon batasan kag ipabilin ang disiplina.
Suno kay Peremne, apisar sang natabo sa tunga sang iya personal nga abyan nga si Larupay kag sang Philippine Army, kinahanglan mabuligay sa gihapon sila.
May kaangtanan sa mga alegasyon nga si Larupay ang una nga nagpalapit sa tatlo ka katapo sang militar kag nagpangtaya sang armas, gin-athag ni Peremne nga sa iya pagkilala kay Larupay, tuman kalaba sang pasenysa kag mainabyanon ini, gani posible suno sa iya nga may dako nga rason sa likod sang insidente.
Gin-ako naman sang natungdan nga nagserbe ini nga leksyon sa ila sa BJMP sa diin nagakadapat nga labaan pa nila ang ila pasensya kag pag-intindi ilabi na kun magtaris sa dalanon.
Matandaan nga ginpasakaan na sang kaso nga murder ang suspek nga si Private First Class Bjourn Kirby Esposo, 26; kag mga ginapahayag accomplice ukon kahimbon nga sanday Staff Sergeant Nelson Sorilla, 40; kag Nilo Silao alias Tata, 47, miyembro sang Citizen Armed Force Geographical Unit (CAFGU).
