ILOILO CITY – Nagdepensa ang pamunuan sang Iloilo Provincial Integrated Jail (IPIJ) sa banwa sang Pototan, Iloilo kasunod sang pagkadakop sa cashier sang kooperatiba sini nga nagabaligya sang iligal nga droga sa sulod sang presuhan.
Nagasulod man ang iligal nga droga partikular ang shabu, sa nasambit nga presuhan paagi sa pagtago sini sa habon.
Sa ginpatigayon nga operasyon kagab-i sang Drug Enforcement Unit sang Iloilo, nadakpan ang subject sang search warrant nga si Geraldine Publico kag live-in partner nga si Carlo Gonzalo kag nakuha sa mga ini ang pito ka sachet sang shabu.
Si Publico ang cashier sa kooperatiba kag ginpahayag sini nga ang habon kun sa diin ginatago ang droga, ang iya ginabakal sa preso sang Iloilo Provincial Integrated Jail.
Sa interview sang Bombo Radyo Iloilo, ginpahayag ni Jail Senior Insp. Abner Zamora, pinuno sang IPIJ, imposible ang ginapahayag ni Publico nga nagabakal ini sang habon sa preso nga si Alfredo Samonte.
Nanindugan ang jail warden nga antes makasulod ang anuman nga bagay sa sulod sang presuhan, maid-id ini nga gina-inspeksyon.
Suno kay Zamora, matapos mabatian sa Bombo Radyo ang mga alegasyon sang cashier, ginpahayag ni Zamora nga gilayon niya ginpatawag ang preso nga ginpanginwala ang alegasyon ni Publico.
Ginpahayag ni Zamora nga nakahanda ini sa anuman nga imbestigasyon.
