ILOILO CITY- Nagbungguanay ang service vehicle sang Bureau of Jail Management and Penology- Passi City kag ang isa ka Nissan Almera sa Barangay Amamaros, Pototan, Iloilo.
Sa interview sang Bombo Radyo kay Police Major Ciriaco Esquilarga, hepe sang Pototan Municipal Police Station, iya ginpahayag nga naghalin sa Passi City kag padulong sa banwa sang Pavia ang salakyan sang BJMP samtang padulong naman sa Duenas ang Nissan Almera.
Suno kay Esquilarga, nag-overtake sa isa ka truck ang Nissan Almera nga ginamaneho ni Mark Anthony dela Cruz,24, residente sang Ortiz, Iloilo City Proper, apang nadulaan ini sang kontrol, naglapaw sa pihak nga lane, nagtiyog sa dalan kag didto na sila nagbungguanay sang service vehicle sang BJMP.
Bangod sa impact, nagupi gid ang bumper sang BJMP service vehicle ko sa diin ginbudlayan pa ang otoridad nga pagwaon ang driver nga si Jail Officer 3 Felizardo Agdalipe nga ginapahayag nag-angkon gid sang fracture apang yara na man sa maayo nga kahimtangan.
Wala naman nasamaran ang duha pa ka BJMP personnel nga sanday Jail Officer 1 Jovanie Cabusbusan kag Jail Officer 1 Kevin Pio nga nagasakay man sa amo nga service vehicle.
Yara naman sa kustodiya sang Pototan Municipal Police Station si dela Cruz.
