ILOILO CITY – Gin-lockdown ang bug-os nga jail facility sang Bureau of Jail Management ang Penology – Ungka kasunod sang na record nga 40 ka dugang nga COVID-19 cases.
Ini ang ginkumpirma sa Bombo Radyo ni Iloilo City Mayor Jerry Treñas kun sa diin, ginpahayag sang alkalde nga naglab-ot na sa 87 ang total COVID-19 cases nga na record sa nasambit nga ahensya sang gobyerno.
Suno kay Treñas, antes pa man sini, ginapahayag nga may isa ka preso halin sa Iloilo District Jail sa Pototan, Iloilo ang gindala sa hospital sa syudad matapos naglain ang pamatyag.
Sang nakaguwa na sa hospital, temporaryo anay nga ginpatinir sa BJMP-Ungka ang nasambit nga preso kag sang nagligad lang nga adlaw, ginbawi-an ini sang kabuhi kag nakumpirma nga nagpositibo sa COVID-19.
Bangud sini, nagpositibo man sa COVID-19 ang 38 ka preso kag duha ka BJMP personnel.
