Nagpasalig ang Bureau of Jail Management and Penology (BJMP) nga wala sang ” VIP treatment” nga ihatag kay pastor Apollo Quiboloy kag sa apat ka iban pa nga co-accused sa tion nga sayluhon ang ila kustodiya.
Suno kay BJMP Spokesperson Joseph Bustinera, apisar si Quiboloy ang isa ka high-profile inmate, hatagan sila sang normal treatment kaangay sang iban nga inmate.
Ginpahayag man sini nga naka-standby sila, madayon man ukon indi, ang pagsaylo sang kustodiya kanday Quiboloy kag co-accused halin sa Philippine National Police custodial center sa Camp Crame pakadto sa Payatas male dormitory kag Camp Karingal female dormitory.
Ginsiling ni Bustinera nga ang selda ni Quiboloy ang 4.7 square meters kag makasarang sa pag-akomodar sang 10 inmates bangud may yara ini sang lima ka double-deck beds.
Dugang niya, ang pasilidad ang may zero congestion rate bangud sa 4,400 maximum capacity, may yara pa lang ini sang 4,200 inmates.
May kaangtanan sa posibilidad nga maghingyo ang kampo ni Quiboloy tuhoy sa iya pagtinir sa correctional facility sa rason nga isa ini ka high-profile inmate, ginpanindugan ni Bustinera nga indi ini pagtugutan.
