Isa ka man bala sa nanamitan sang paminta ukon black pepper sa diin ginalakot mo ini sa imo kalo-kalo nga kan-on ukon tinig-ang?
Ang black pepper ukon paminta ang isa sa pinakabantog nga spices sa bilog nga kalibutan sa diin may yara ini sang medyo makahang nga sabor nga manamit ilakot sa madamo nga sahi sang dishes.
Apang sa likod sang paminta nga makit-an naton sa aton kusina, natukiban sang health experts nga ang ini nga sahi sang spices ang nagapalikaw sa pagkaguba sang cells sa lawas sang tawo.
Suno kay Makayla Meixner, registered dietitian nga nakabase sa Vail, Colorado, ini bangud manggaranon ang black pepper sa potent antioxidant nga ginatawag nga piperine.
Pahayag ni Meixner, sa test-tube studies, natukiban nga ang piperine sa paminta ang nagapahinay sang pagdoble sang breast, prostate kag colon cancer cells.
Dugang pa sang eksperto, paborable man ang paminta para sa mga indibidwal nga nagadiet bangud nagapabuhin sang ini sang appetite sa imo nga pagkaon.
