Wala sang iban nga balasulon si anay provincial administrator/ blocktimer nga si Manuel Boy Mejorada kun ngaa gin-aresto ini sa kaso nga 5 counts sang cyberlibel kundi ang iya kaugalingon kag abugado.
Ini kasunod sang reklamo ni Mejorada nga hungod ini nga ginpaaresto sang tinalikdan nga Hunyo 7,nga natuon sa adlaw sang Biernes agud indi ini maka-piyansa gilayon.
Sa interview sang Bombo Radyo Iloilo kay Atty. Hector Teodosio, legal counsel ni outgoing Iloilo Governor Arthur Defensor Sr. nga amo ang nagpasaka sang kaso batok sa blocktimer, iya ginpahayag nga kun ginbantayan lang ni Mejorada kun san-o ginfile ang kaso kag wala na ginhulat ang pag-isyu sang warrant of arrest antes magpiyansa, wala na naglab-ot pa ang sitwasyon sa diin ginkinahanglan pa nga i-serbi sa iya puluy-an ang warrant of arrest.
Matandaan nga ginpasibangdan ni Mejorada sang paghimbunanay sanday Governor Defensor kag si Police Major Jonathan Pinuela sang Provincial Special Operations Group (PSOG) nga amo ang nagserbi sang warrant of arrest sa iya balay sa Parc Regency, Balabag, Pavia, Iloilo sa diin gin-alegar sang blocktimer nga gin-harass siya sang police official.
