Nagapatarasak lang ang National Grid Corporation of the Philippines (NGCP) sa pagbutang sang dugang nga sukot sa bill sang kuryente sa mga konsumidor.
Ini ang nangin pahayag ni Iloilo 4th District Board Member Rolando Distura kadungan sang ginpatigayon nga committee hearing sang Sangguniang Panlalawigan.
Suno kay Board Member Distura, ginapabakho sang NGCP ang balaydan sa kuryente sa komunidad kag mga pumuluyo sang probinsya.
Madamo kuntani sang kwestyun ang natungdan sa National Grid Corporation of the Philippines kaangay na lang sang ila awtoridad sa pagbutang sang dugang nga balaydan sa konsumidor pinaagi sa pagsukot sang line rental kag kun nag-agi ini sa insakto nga proseso.
Bangud, pahayag niya, nasaad sa Grid Code nga dapat may yara sang komunikasyon ang distribution utility kag NGCP apang nagaguwa nga wala man gali ginpahibalo ang mga electric cooperatives tuhoy sa line rental.
