Ginkadismasya ni Iloilo Provincial Board Member Rolando Distura ang mahina nga response sang Sugar Regulatory Administration (SRA) sa epekto sang red-striped soft scale insect (RSSI) sa probinsya.
Suno kay Distura, gilayon sila nga nagpangayo sang bulig sa SRA kag Department of Agriculture agud gilayon nga matapna ang paglapta sang peste.
Apang, padayon sa gihapon ang pagdamo sini sa probinsya nga nangin perwisyo na sa produkto sang mga mangunguma.
Apisar sini gindayaw man ni Distura ang madasig nga pagresponde sang Iloilo Provincial Government nga nakabulig sa mga apektado.
Samtang, ginpahayag ni Provincial Agriculturist II Ailyn Mae Tanalgo nga may gin-alokar nga 15 milyon pesos nga pondo sa idalom sang Office of the Governor para sa pagbulig sa mga mangunguma nga apektado sang RSSI infestation.
Suno pa sa iya nga plano sang Provincial Agriculture Office nga ihatag sa mga apektado nga banwa ang pondo agud mapadasig ang pagbakal sang biological control agents nga gamiton agud mapunggan ang pagdamo pa sang RSSI.
Dugang pa ni Tanalgo nga para naman sa long-term solution, plano sang probinsya nga palaparon ang mga micro-control laboratory kag magpatindog sang mga nursery sa mga banwa agud mapalig-on ang pagkontrol sang peste.
