May kapasidad pa bala ang mga lokal nga panguluhan sa Iloilo sa pagtapna sang padayon nga pagbaha kag epekto sang climate change? Para kay Board Member Rolando Distura, kinahanglan sang bag-o nga direksyon kag mas epektibo nga disaster strategies bangud sang climate-change.
Sa interview sang Bombo Radyo kay Board Member Rolando Distura, Chairman sang Committee on Disaster Risk Reduction and Management, iya ginpabutyag nga dapat na kilalahon sang tanan ang realidad sang “new normal” sa kalamidad kag ang kinahanglanon nga magbag-o man sang mga estratehiya sa lokal nga lebel.
Suno kay BM Distura, indi na mabawi ang epekto sang climate change gani kinahanglan nga mag-adoptar ang mga local government units sang mas epektibo nga mga tikang para ma-mitigate ang epekto sini.
Iya ginpunto nga dapat sundon ang Comprehensive Land Use Plan, may malig-on nga Disaster Management Plan, kag istrikto nga implementasyon sang National Building Code sa mga high-risk areas.
Dugang pa niya, isa sa mga aktibidad nga ginhimo amo ang pagpahamtang sang mga DOLE-TUPAD workers para magtinlu sang mga cross-drainage systems sa mga banwa.
Gintumod man niya ang kahalugan sang database policy kag ang regular nga pag-review sang disaster plans agud siguruhon nga epektibo kag up-to-date ini sa kahimtangan subong.
Suno sa iya, indi malikawan nga isa sa mga dako nga problema sang probinsya amo ang pagbaha, kag dapat tutukan ini sa paagi sang pagsunod sa mga polisiya.
Nagpanawagan man siya nga gamiton ang science and technology sa pagporma sang mga flood control systems nga mas angay sa present nga sitwasyon.
