ILOILO CITY – Nagpanawagan si Iloilo 3rd District Board Member Matt Palabrica sa mga rice retailers, millers, traders kag importers nga ulikdan kag suportahan ang mga mangunguma.
Sa interview sang Bombo Radyo kay Palabrica, iya ginpahayag nga mas maayo gid kun may yara sang maayo nga relasyon ang tanan kay may yara sang panindugan kun paano mapadayon ang agrikultura sa Pilipinas.
Humalin sang mga nagligad nga adminitrasyon tubtob subong pahayag niya, daw kaangay nga roller coster ride ang sitwasyon sang sektor sang agrikultura gani kinahanglan suno sa iya nga mag-isa ang tanan humalin sa mangunguma padulong sa mga retailers bangud kun wala sang unity, mabilin gid sa tabtaban ang agrikultura.
Ginaduso man sang board member kay Iloilo Governor Arthur Defensor, Jr. nga kun mahimo, ang probinsya ang maka-export man sang bugas sa luwas sang pungsod.
Apang gin-ako niya nga pagpanghangkat ini para sa probinsya.
Luyag man sang natungdan nga may yara sang unified variety sa bugas sa diin maka-produce man ang Iloilo sang isa lang ka variety agud nga maka-compete sa imported rice.
Nagapati si Palabrica nga may yara sang puturo ang agrikultura sa Pilipinas kun gina-ulikdan ang mga mangunguma bangud sa subong, daw kaangay nga gina-abusohan lamang sila.
Ginhalimbawa sini ang Republic Act 11203 ukon ang Rice Tariffication Law nga dako nga palas-anon para sa mga Filipino farmers.
Isa pa suno sa iya amo ang pagpaguwa sang Executive order 39 nga naga-set sang price ceiling sa regular milled rice sa P41 per kilo kag well milled rice sa P45 per kilo.
Ginkwestyon ni Palabrica kun sin-o nga lango-lango ang naghutik sa presidente nga ipatuman ang price cap sa Setyembre nga amo ang bulan sang tag-alani.
