Magapasar sang resolusyon si Iloilo 4th District Board Member kag Sangguniang Panlalawigan Committee on Energy Chairman Rolando Distura agud ipatawag sa isa ka committee hearing ang mga nagabug-os sang power generation sector sa Iloilo.
Ini agud mapamangkot mismo ang mga natungdan tuhoy sa nagakatabo nga inoras nga power interruptions sa syudad kag probinsya sang Iloilo.
Sa interview sang Bombo Radyo kay Distura, iya ginpahayag nga kinahanglan mahibaluan kun ano ang sitwasyon sa power supply, ilabi na nga nagdungan ang pag-shutdown sang pila ka power plants.
Tinutuyo man sini nga maklaruhan ang publiko kag mahatagan ang mga ini sang nagakaigo nga sabat sa ila mga tikang nga dapat pagahimuon agud malikawan ang power interruptions.
Suno kay Distura, importante nga may klaro nga sabat kag solusyon halin sa power generation sector, ilabi na nga direkta nga apektado ang mga konsumidor sang sunod-sunod nga pagkadula sang kuryente.
Nahibaluan nga bangud sa kakulang sang supply sang kuryente sa grid sunod-sunod man nga pag-brownout ang naeksperyensyahan sa syudad sang Iloilo nga nakaperwisyo na sa matag-adlaw nga pagginawi sang publiko.
