Ginsuspinde ni Philippine National Police (PNP) Chief Gen. Guillermo Eleazar ang Body Mass Index (BMI) requirement para sa promotion sang mga pulis.
Ini ang kasunod sang rekomendasyon halin sa isa sa mga units sang PNP nga Directorate for Personnel and Records Management (DPRM).
Suno kay Eleazar, ginpirmahan niya ang suspension order bangud ginkonsidera niya ang kabudlay para sa mga pulis nga magpaniwang subong nga tion sang pandemya.
Apang kasunod sini, gin-athag sang PNP chief nga bawion man niya ang suspension order kun magbalik na sa normal ang tanan.
Matandaan nga santo sa PNP Memorandum Circular 2020-029 nga gin-isyu ni former PNP chief Archie Gamboa, ang mga PNP personnel lang nga may normal ukon acceptable BMI ang pwede nga mapromote.
Ini nga BMI requirement ang ginpatuman sa sunod nga mga administrasyon sang PNP.
Matandaan nga bisan si former PNP chief Debold Sinas ang nag-enrol man sa sini nga programa.
