Gin-athag ni Iloilo 4th District Board Member Rolando Distura nga libre ang dengue testing sa tanan nga mga provincial hospital sa Iloilo.
Sa interview sang Bombo Radyo kay Board Member Distura, iya ginpahayag nga bukas ang mga ospital sa mga pumuluyo nga may tuyo nga magpa-dengue test kag ini ang libre bangud nagapaidalum ini sa ‘no balance billing’ kag iga-charge sa Philhealth.
Suno kay Distura, dapat nga mabal-an ini sang mga pumuluyo bangud masami nga nagatahap sila nga magpa-test bangud abi nila, mahal kag dako ang balaydan.
Ginsaysay man sini nga ang Iloilo Provincial Health Office (IPHO) ang may yara sang embedded nga pondo agud nga magamit sa mga kapareho sini nga outbreaks.
Ini kasunod man sa pagdeklara sang Sangguniang Panlalawigan sa Iloilo bilang yara sa state of calamity bangud sa dengue outbreak.
Nahibaluan nga duha ukon masobra ka mga banwa ang kinahanglan nga maka-declare sang state of calamity antes nga makadeklara man sang state of calamity ang bug-os nga probinsya.
Ini ang basic recommendation kag outputs man sang tagsa ka Local Government Unit (LGU) nga nangin rason man agud nga ipaidalum ang probinsya sa amo nga estado.
Gin-ako man sang natungdan nga indi masarangan sang gobyerno ang ini nga outbreak kon wala sang bulig kag partisipasyon sang mga pumuluyo.
