Nagapati si Iloilo 3rd District Board Member Jason Gonzales nga nesisidad ang pagbakal sang Iloilo Province sang mga salakyan para sa mga board members, ex-officio members, kag opisina sang bise-gobernador.
Ang pito ka mga salakyan ang ginabanta nagabalor sang P14 Million sa diin kapin P2 Million ang isa ka unit.
Sa interview sang Bombo Radyo kay Gonzales, iya ginpahayag nga sa ila sa 3rd District, masobra 400 ka mga barangay ang ila nasakupan gani dako ang mabulig sang salakyan nga ihatag sa ila opisina agud malab-ot ang tanan nila nga constituents sa distrito.
Suno kay Gonzales, kun masunod sang probinsya ang tanan nga pagsulundan sang Department of the Interior and Local Government (DILG) sa pagbakal sang salakyan, wala siya sang may nakita nga isyu diri.
Nagapati man si Gonzales nga indi dapat mangin isyu ang pagbakal sang probinsya sang salakyan bangud 2019 pa ini naplanuhan kag ginpondohan apang subong lang madayon bangud sa mga nangin isyu sadto nga ginhitso.
May kaangtanan sa pamangkot nga gamiton ang pondo sa salakyan sa pagbakal sang COVID-19 vaccine sa Iloilo Province, hugot man nga ginpanidugan sang natungdan nga wala siya sang may nakita nga problema diri.
Apang suno kay Gonzales, may COVID-19 pandemic man ukon wala, importante ang ihatag sa ila nga mga salakyan agud mapasangkad ang ila trabaho sa Sangguniang Panlalawigan.
