Ginaduso ni Iloilo 2nd District Board Member June Mondejar nga ginikanan ang dapat nga magpanguna nga magsaway sa ila nga kabataan nga nagamaneho sang motorsiklo agud nga malikawan ang disgrasya sa dalan.
Ini kasunod man sang sunod-sunod nga kaso sang vehicular accident nga involved ang mga menor-de-edad.
Sa interview sang Bombo Radyo kay Board Member Mondejar, iya ginpahayag nga kinahanglan nga maplanohan na ang mga tikang agud ma-address ang amo nga problema ilabi na sa mga reckless kon mag-drive.
Suno kay Mondejar, dapat lang nga makahimo ang Iloilo Provincial Government kag iban nga concern agencies sang estratehiya agud nga mabuhinan ang vehicular accident sa probinsya.
Gin-athag man sini nga dako ang impluwensya sang tagsa ka ginikanan agud nga mapalayo ang ila anak sa makahalanusbo nga insidente sa dalan.
Ginpunto man sang natungdan ang mga dalan nga wala sang signages ukon early warning devices nga mahimo makatuga sang huol kag mangin rason sang disgrasya.
