ILOILO CITY- Nagpangabay ang chairman sang Committee on Public Order and Security sang sangguniang panlalawigan sa mga Indian nationals nga indi magkahadlok nga mag- file sang kaso batuk sa mga tawo nga responsable sa serye sa mga pagpanghold- up sa ila.
Sa interview sang Bombo Radyo kay Board Member June Mondejar, iya ginpahayag nga kun masami lang nga mangibabaw ang kahadlok sang mga indian nationals, maanad na lang ang mga suspek sa ila ginahimo nga krimen.
Suno kay Mondejar, indi man malayo nga matabo nga himuon lang sila nga mga milking cows sang mga suspek ukon sulit-sulit lang sila nga biktimahon sang mga kriminal kun indi ang mga ini matudluan sang leksyon paagi sa pagpasaka sang kaso batok sa ila.
Ginkalipay naman sang board member nga nadakpan na ang ginaalegar mastermind sa asud asud nga hold up incident sa mga Indian nationals.
Ini amo si Kimuel Dipliyan, alyas ‘Bunjo’, 32, kag residente sang Barangay Capaliz, Dumangas, Iloilo.
Matandaan nga una na nga nagsungka ang mga kaupod ni Bunjo sa krimen nga amo sanday alyas Butch, residente sang Barangay Capaliz, Dumangas; kag alyas Boyboy, residente sang Barangay Bacay, Dumangas.
