ILOILO CITY – Ginrekomendar ni Ex-Officio Board Member Ramon Sullano nga dapat nga mahibaluan anay kun sin-o ang may kapaltahan sa pagtukod sang depektibo nga P680-million Ungka Flyover, antes pangitaon kag ihatag ang dugang nga P250-million nga pondo para sa liwat nga pagkaayo sini.
Sa interview sang Bombo Radyo kay Sullano, iya ginpahayag nga mas maayo nga matumod kun bala sa bureau of design sang Department or Public Works and Highways ukon sa kontraktor nga International Builders Corporation ang may yara sang sala agud mahibaluan kun diin kuhaon ang pondo sa liwat nga pagpakay-o sang flyover.
Apang kun nagasiling ang ahensya nga mangita pa sila sang pondo suno kay Board Member Sullano, daw kaangay nga ginaako nila nga sila ang may kapaltahan.
Indi man pwede pahayag sang board member nga mapaguwa lang ang gobyerno sang P250-million nga halin sa kwarta sang pumuluyo nga wala mahibaluan kun sin-o ang may sala sa kapalpakan sang proyekto.
Samtang, nagrekomendar naman ang Sangguniang Panlalawigan sang Iloilo sa posible nga pagdihon sang resolution agud ipalab-ot sa senado ang sitwasyon sa Ungka Flyover kag para makahimo sang senate inquiry ukon i-address ini sa Office of the Ombudsman.
