ILOILO CITY – Nagahingyo sang bulig ang mga boarders matapos nagpositibo sa Coronavirus Disease 2019 (COVID-19) ang isa ka security guard nga nagatinir sa isa ka boarding house sa Brgy. Our Lady of Fatima, Jaro, Iloilo City.
Sa interview sang Bombo Radyo kay Boy, isa sa mga nagatinir sa nasambit nga boarding house, iya ginpahayag nga pila lamang ka dupa ang antad sang iya kwarto gikan sa kwarto sang COVID-19 positive.
Suno kay Boy, ang security guard ang nakuha na sang Local Government Unit sang Calinog, Iloilo apang tubtub subong, wala pa matinlu-an ang kwarto sang COVID-19 positive.
Ginpahayag ni Boy nga wala nagaguwa sa kwarto ang security guard matapos nakumpirma nga nagpositibo siya sa virus kag nagasuksok man ini sang face mask sa tion nga magguwa sa kwarto agud maggamit sang comfort room.
Bangud sini, ginpahayag ni Boy nga ginpaidalom sila sa quarantine kag bangud nga indi sila makaguwa sa boarding house, kun tani mahatagan man sila sang rasyon.
