Ginkwestyon ni Senator Chiz Escudero ang Bureau of Customs (BOC) kun ngaa wala pa gihapon napasaka ang kaso batok sa mga smugglers kag hoarders sang bugas apisar sang sunod-sunod nga raid nga ginpatigayon sa mga warehouse halin pa sang nagliligad nga bulan.
Septyembre 15 sang nakumpiska sa Port of Zamboanga ang 42,180 nga sako sang bugas balor P42-million matapos nahibaluan sang otoridad nga indi ini covered sang rekisito nga sanitary and phytosanitary import clearance halin sa Bureau of Plant Industry.
Antes sina, nag-inspect man ang Customs sa tatlo ka warehouses sa Bulacan kag may nakit-an nga naka-stock nga gina-suspetsahan nga imported nga bugas balor P505-million.
Sang sini lang, may raid man ang Customs sa duha ka mga warehouse sa Pulang Lupa, Las Piñas kag Bacoor, Cavite kun sa diin balor P40-million nga bugas ang nakit-an nga ginpahayag halin sa Vietnam, Thailand, kag China.
Ginkwestyon man ni Escudero kun ngaa wala ginsapubliko ang pangalan sang traders kag operators. Pahayag pa sini, indi lamang raid ang dapat himuon kundi dapat nga pasakaan sang kaso agud mapamatud-an nga seryoso ang administrasyon sa kampanya batok sa mga kartel sang bugas.
Dapat man suno sa iya nga mag-update ang gobyerno sa ngalan sang transparency — halimbawa, sin-o ang naga-oversee sa pag-dispose sang nakumpiska nga bugas, paano ini himuon, ukon diin ini makadto.
Sa idalom sang Anti-Agricultural Smuggling Act of 2016 ukon sa Republic Act 10845, ang large-scale smuggling sang agricultural products ang ginakabig nga isa ka economic sabotage. #
