ILOILO CITY – Nagapadayon pa ang pagpakig-away sang Bureau of Fire Protection sa sunog nga nagluntad sa bodega sang factory sang feeds sa Brgy. Maliao Pavia, Iloilo.
Sa inisyal nga pagpangusisa sang Bombo Radyo sa lugar, las 3:45 sang hapon nagluntad ang sunog sa diin suno sa naka duty nga gwardiya nga si SG Rene Garete, natalupangdan na gid lamang sini ang kalayo sa likod nga bahin sang bodega nga ginapanag-iyahan sang B-Meg Corporation.
Nagtuga naman sang pagkahangawa sa mga pumuluyo nga naga-istar sa likod sang bodega ang tuman ka daku nga sunog.
Sa interview sang Bombo Radyo kay Pavia Mayor Michael Gorriceta, ginpahayag sini nga nagpangayo ini sa gilayon sang bulig sa mga malapit nga banwa kag fire volunteer groups ilabi pa nga ang kadamuan sang mga pamalay sa likod nga bahin sang bodega nga sakop na sang Brgy. Purok Dos Pavia, Iloilo ang human sa light materials.

Nahibaluan nga nabudlayan sa pagpalong sang kalayo ang mga bombero ilabi pa nga madamu sang mga naka-stock nga sinako sang feeds kag mga combustible materials sa amo na bodega.