Gin-report sang Board of Investments (BOI) nga nakatipon na ang Marcos Jr. administration sang P2.368 trillion sa investments, balor kun sa diin nalakip ang nabulsa sa mga byahe ni President Ferdinand “Bongbong” Marcos Jr. sa luwas snag pungsod.
Ini nga statement sang board ang ginpagwa matapos ang report man sang Philippine Statistics Authority (PSA) nga ang foreign investment pledges ang nagsarurot sang masobra 63.6% halin sang Enero tubtub Marso subong nga tuig ipaanggid sa amo man nga period sang 2023.
Sa isa ka forum, nagpaathag si BOI Director Sandra Recolizado paagi sa pagpresentar sang figures halin sang Hulyo 2022 tubtub Abril 2024.
Ang P2.368 trillion total suno sa iya ang ginabug-usan sang 157 projects apang wala pa nalakip ang iban nga data halin sa Philippine Economic Zone Authority (PEZA) kag iban pa nga investment promotion agencies.
Para sa Board suno sa director, maayo nga paagi ang presidential visits agud nga ma-promote ang Pilipinas.
Nahibaluan nga halin sang nangin presidente si Marcos sang Hunyo 30, 2022 kag tubtub sa katapusan sang 2023, 19 ka beses ini nga nakakadto sa luwas sang pungsod.
