ILOILO CITY-Ginkumpirma sang Philippine Army nga nalakip sa lima ka mga napatay nga myembro sang New People’s Army (NPA) sa engkwentro sa Barangay Aglonok, Calino, Iloilo amo ang bomb expert sang grupo.
Ini amo si Armando Rogelio Sabares, residente sang Barangay Igcaratong, San Joaquin kag miembro sang Squad 2, RHQF, Kometing Rehiyon-Panay kag anay miembro man sang Executive Command (EXECOM).
Sa interview sang Bombo Radyo kay Lt. Col. J-Jay Javines, spokesperson sang 3rd Infantry Division (ID) sang Philippine Amry, iya ginpahayag nga si Sabares ang nagahimo sang mga Improvised Explosive Devices (IED) kag may kaangtanan ini sa nagluntad nga mga insidente sang pagpamomba sa Panay kag Negros nga nagresulta sa kamatayon sang pila ka mga tropa sang gobyerno.
Base sa record sang otoridad, si Sabares ang responsable si pagpamomba sa Barangay Caratagan, Calinog sang 2005 kun sa diin siyam ka suldado ang patay, amo man sa Janiuay sang 2018 kag sa Lambunao sang 2022.
Nahibaluan nga si Sabares ang may yara sang kaso nga multiple murder kag frustrated murder sa probinsya sang Antique.
