Bombo abogado, gin-athag ang rason sang acquittal sang bata ni Justice Sec Jesus Crispin Remulla

Ginpaathag sang Bombo Abogado ang rason sang madasig nga acquittal sang anak ni Justice Secretary Jesus Crispin Remulla.

Sa interview sang Bombo Radyo kay Atty Noel Palomado, iya ginpahayag nga bangud kwestyonable nga chain of custody ukon ang rekord sang origin sang item nga ginpadala kay Juanito Jose Remulla III, rason nga ini ang gin-abswelto sang Las Piñas Regional Trial Court Branch 197 kahapon.

Ginpahayag man sang natungdan nga indi bastante nga pamatuod nga naga-engage sa unlawful activity ang bata nga Remulla base lamang sa pagbaton sini sang package sa isa ka controlled delivery.

Madumduman nga sang Oktubre 2022, gindakop sang mga agents sang Philippine Drug Enforcement Agency si Remulla sang nagbaton sang package nga may unod nga P1.3M nga balor sang high-grade marijuana.

Nahibaluan nga nag-atubang sang kaso nga paglapas sa Republic Act 9165 ukon Comprehensive Dangerous Drugs Act of 2002 si Remulla.