Iloilo City – Ginpatpat sang isa ka Bombo Abogado ang posible rason kun ngaa gindumilian nga magpakigkita si anay Justice Undersecretary Reynante Orceo sa iya kliyente nga akusado nga ginakabig nga co-mastermind sa pagpatay kay Negros Oriental Governor Roel Degamo.
Ang ginatudlo nga co-mastermind amo si Marvin Miranda, isa ka army reservist nga nadakpan sang mga otoridad sa Barangay Mablad, Barbaza, Antique sang Marso 28.
Sa interview sang Bombo Radyo kay Atty. Noel Palomado, iya ginpahayag nga gindumilian sang National Bureau of Investigation nga makig-istorya si Orceo kay Miranda bangud posible nga nagpa-inhibit ang pihak nga kampo batok kay Orceo para magtindog nga legal counsel.
Suno kay Palomado, bangud nagserbe bilang anay Justice Undersecretary antes nagpanaog sa pwesto sang 2018 sang Duterte administration si Orceo, mahimo nga ginalantaw sang pihak nga kampo nga may impluwensiya ini sa gihapon sa amo nga ahensya kag mangin disbentaha ini sa pihak nga kampo.
Nahibaluan nga sa subong, nagapangita na sang legal procedures si Orceo agud maistorya si Miranda.
Nahibaluan nga si Miranda ang isa sa mga major players sa likod sang pag-assasinate kay Governor Degamo kag sa walo ka mga sibilyan.
