ILOILO CITY – Ginpasidunggan sang Philippine Navy ang Bombo Radyo Iloilo bilang nagapanguna nga Radio Station sa Iloilo kag isa sa mga partner organization sang nasambit nga ahensya.
Natabo ang awarding ceremony kadungan sang joint closing ceremony sang Philippine Navy nga ginpatigayon sa Headquarters sang Naval Reserve Center-Western Visayas sa Arevalo, Iloilo City.
Sa interview sang Bombo Radyo kay Commander Glyn Pahilanga, Deputy Commander sang Naval Reserve Center- Western Visayas, iya ginpahayag nga ang Certificate of Appreciation nga ginhatag sa Bombo Radyo Iloilo ang isa ka palatandaan sang pakilala sang Philippine Navy sa maayo nga impluwensya kag ikasarang sang network sa patag sang pagwaragwag.
Suno kay Pahilanga, ang Bombo Radyo Philippines ang isa ka masaligan nga partner organization sa mga aktibidad sang Philippine Navy.
Ginpahayag ni Pahilanga nga bilang balos, magasuprta man ang Philippine Navy sa mga aktibidad kag programa sang Bombo Radyo Philippines sa diin isa na diri ang nagahilapit nga Dugong Bombo nga pagahiwaton sa bulan sang Nobyembre.
Kadungan sini, ginpasidunggan man sang Philippine Navy ang 26 ka reservist nga nagbulig sang natabo ang Iloilo Strait Tragedy.
Suno kay Pahilanga, ang mga nasambit nga reservist ang nakabaton sang military commendation medal.
Ginpahayag ni Pahilanga nga tuman ka importante nga ipaidalom sa maid-id nga training ang mga reservist agud nga makahatag sang bulig sa tion sang emerhensya.
