Ginkilala ang flagship station sang Bombo Radyo Philippines sa ginpatigayon nga 25th Blood Donors Awarding and Recognition sang Philippine Red Cross-Iloilo Chapter subong nga adlaw, Agusto 14.
Nakuha sang Bombo Radyo Iloilo ang ikaduha nga pwesto sa Top Performing Organizations and Institutions bangud sa ginpatigayon nga Dugong Bombo nga nakakolekta sang 331 units sang dugo sang 2025.
Ang amo nga recognition ginhatag sa nagapanguna nga mga organization kag institution partners sang Philippine Red Cross-Iloilo Chapter nga may pinakamataas nga blood collection sa isa lang ka tuig.
Magluwas diri, ginbaton man sang Bombo Radyo Iloilo ang Pillar of Blood-Program Excellence Level 1.
Ini naman ang nagakilala sang padayon nga suporta, commitment, kag indi matupungan nga dedikasyon sa misyon nga pagsalbar sang kabuhi paagi sa pagpadayon sang voluntary blood donation program.
Ang nagkuha sang award amo si Bombo John Felco Talento, ang Area Manager sang Bombo Radyo Philippines para sa Visayas.
Sa interview naman sang Bombo Radyo kay Dr. Carlo Nolan Carado, Philippine Red Cross Blood Center Manager, iya ginpahayag nga ini nga pagtilipon amo ang pagkilala sa nangin papel sang mga organizers sang blood donation activities nga nakasugpon sang kabuhi sang mga Ilonggo.
Gin-agda man sini ang publiko nga magpakigbahin naman sa Dugong Bombo 2026 sa palaabuton nga Nobyembre 14, 2026.
Nahibaluan nga ang Dugong Bombo program tuigan nga ginapatigayon sa 25 key cities sa bilog nga pungsod kun sa diin naga-operate ang 32 ka fully digitalized nga Bombo Radyo kag Star FM stations.
Kilala ini bilang “Dugong Bombo: A Little Pain, A Life to Gain” nga ginapatigayon kaupod ang Bombo Radyo Philippines ang Bombo Radyo Philippines Foundation, Inc. ang Philippine Red Cross.
Sa bilog nga Pilipinas sang 2025, nakatipon ang Dugong Bombo sang kabug-usan nga 4,657 ka bags, nga katumbas sang 2,095,650 cc, ukon 2,096 ka litro, ukon 554 ka gallons, ukon 10 ka drum sang nadonar nga dugo. Nagikan ini sa 4,657 ka maalwan kag madinalag-on naton nga mga donors sa bilog nga pungsod.#
