ILOILO CITY — Dako ang pagpasalamat sang Asilo de Molo Inc. matapos nga nakabaton ini sang 40,000 liters nga tubig halin sa Bombo Radyo Philippines Foundation Incorporated kag Flowater Resources Iloilo Incorporated.
Sa interview sang Bombo Radyo kay Mrs. Magdalina Tumilba, head sang Social Service sang Asilo de Molo, iya ginpahayag nga dako ini nga bulig para sa ila, ilabi na sa mga caregivers nga amo ang nagapaligo sa mga katigulangan adlaw-adlaw.
Suno kay Tumilba, sugod sang Abril sang sila ang naka-eksperyensya sang kakulangan sang tubig, sa diin wala na nagatubod ang ila bomba kag indi man makasustener ang bubon sa ila kinahanglanon nga tubig .
Ginpahayag man sini nga makabenepisyo gid ang gin-donar nga tubig sa 26 ka mga senior citizens nga madre, 21 ka mga katigulangan, staffs, kag iban pa nga indibidwal nga yara sa ila talatapan.
Nahibaluan nga bangud sa water shortage, napilitan ang mga caregivers nga magsag-ob sang tubig bangud tuman na gid ka sambot ang ila bubon.
