ILOILO CITY — Naumpawan ang kauhaw sang pila ka mga pumuluyo sang Barangay Sooc, Arevalo, Iloilo City kasunod sang pagdonar sang Bombo Radyo Philippines Foundation, Incorporated kag Flowater Resources Iloilo, Incorporated sang potable water ukon matinlo nga mainom nga tubig.
Sa interview sang Bombo Radyo kay alyas Eduardo, residente sang nasambit nga lugar, iya ginpahayag nga dako nga bulig ang potable water para sa ila bangud sa nagabakal lang sila sang tubig adlaw-adlaw.
Suno kay Eduardo, nagalab-ot sa 10-ka gallon ang ila mabakal nga tubig sa isa ka adlaw bangud apisar nga may linya sila sang tubig, wala man ini nagatubod.
Dako naman ang pagpasalamat sang natungdan bangud ang tatlo ka mga tangke nga ginpuno sang potable water sang Bombo Radyo Philippines Foundation, Incorporated kag Flowater Resources Iloilo, Incorporated ang makasapin-sapin na sa mga pumuluyo ilabi na sa mga nagakuha sang tubig sa bubon.
